یورپی یونین میں ٹرین کے ذریعے سفر کرنے والوں کے لیے ایک بڑی سہولت متعارف کرانے کی تیاری کی جا رہی ہے۔ یورپی پارلیمنٹ اور یورپی کمیشن ایک ایسے “Single EU Train Ticket” منصوبے پر کام کر رہے ہیں جس کے تحت مسافر مستقبل میں مختلف ممالک اور مختلف ریلوے کمپنیوں کی ٹرینوں کے لیے صرف ایک ہی ٹکٹ خرید سکیں گے۔ اس نئے نظام کا مقصد یورپ بھر میں ٹرین سفر کو فضائی سفر کی طرح آسان، تیز اور زیادہ محفوظ بنانا ہے۔ موجودہ صورتحال میں اگر کوئی شخص ایک سے زیادہ ممالک میں سفر کرتا ہے تو اسے الگ الگ کمپنیوں کے ٹکٹ خریدنے پڑتے ہیں، جبکہ تاخیر یا کنکشن مس ہونے کی صورت میں مسافروں کو اکثر اضافی نقصان بھی اٹھانا پڑتا ہے۔ نئے منصوبے کے تحت ایک ہی بکنگ میں پورا سفر شامل ہوگا اور اگر کسی ٹرین کی تاخیر کی وجہ سے اگلا کنکشن چھوٹ جائے تو مسافر کے حقوق بھی محفوظ ہوں گے، یعنی کمپنیوں کو متبادل سفر یا مدد فراہم کرنا ہوگی۔ یورپی یونین اس منصوبے کے ذریعے لوگوں کو ہوائی جہاز کے بجائے ماحول دوست ٹرین سفر کی طرف راغب کرنا چاہتی ہے تاکہ کاربن اخراج کم کیا جا سکے۔ رپورٹ کے مطابق اس نظام میں تکنیکی اور تجارتی رکاوٹیں اب بھی موجود ہیں کیونکہ یورپ کی مختلف ریلوے کمپنیاں اپنے اپنے الگ بکنگ سسٹمز استعمال کرتی ہیں، تاہم یورپی ادارے چاہتے ہیں کہ آنے والے برسوں میں پورے یورپ میں ایک متحد اور آسان ریلوے ٹکٹنگ نظام قائم کیا جائے۔
0 تبصرے